طريقة عمل البطاطس المقرمشة في الفرن
السر في نجاح البطاطس المقرمشة مش في كمية الزيت الكبيرة، لكن في خطوات بسيطة بنعملها أثناء تجهيز البطاطس وتسويتها، حسب نصائح الشيف سارة الحافظ.
مكونات البطاطس المقرمشة في الفرن
* كيلو بطاطس.
* ملعقتان كبيرتان من الزيت.
* ملعقة كبيرة من النشا.
* نصف ملعقة صغيرة من الثوم البودرة.
* نصف ملعقة صغيرة من البابريكا.
* رشة فلفل أسود.
* ملح حسب الرغبة.
* رشة من الزعتر أو الروزماري حسب الرغبة.
خطوات التحضير
* ابدئي بغسل البطاطس كويس وتقشيرها لو حابة، وبعدين قطعيها أصابع متشابهة في الحجم علشان تنضج كلها في نفس الوقت.
* السر الأول: نقع البطاطس
حطي أصابع البطاطس في وعاء فيه ماء بارد لمدة من 20 لـ 30 دقيقة، وبعدين صفيها كويس. الخطوة دي بتساعد على إزالة جزء من النشا اللي على السطح، وده بيدي قوام أحسن أثناء التسوية.
* بعد النقع، جففي البطاطس تمامًا بفوطة نظيفة أو مناديل مطبخ. الخطوة دي مهمة جدًا، لأن المياه على السطح بتمنع القرمشة المطلوبة.
* السر التاني: النشا
حطي البطاطس الجافة في وعاء، وضيفي النشا وقلبيها كويس لغاية ما تغطي طبقة خفيفة كل القطع. مش محتاجة نشا كتير، الهدف إننا نعمل طبقة رقيقة بتدي سطح مقرمش وهو في الفرن.
* بعد كده ضيفي الزيت والتوابل زي البابريكا والثوم البودرة والفلفل الأسود، وقلبي لحد ما تتوزع على كل البطاطس.
* السر التالت: عدم التكديس
سخني الفرن كويس على درجة حرارة عالية، وبعدين رصي البطاطس في صينية واسعة مبطنة بورق زبدة، وابعدي بين القطع قدر الإمكان.
الخطوة دي من أهم الحاجات علشان بطاطس مقرمشة في الفرن؛ لأن لو حطينا كمية كبيرة فوق بعضها، هتتعرض للبخار بدل الحرارة الجافة، فتبقى طرية بدل مقرمشة.
* حطي الصينية في الفرن وسيبي البطاطس لحد ما تاخد لون ذهبي، وبعدين قلبيها على الجانب التاني علشان تتحمر بالتساوي.
إزاي تحصلي على بطاطس مقرمشة زي المطاعم؟
في تفاصيل صغيرة بتفرق في النتيجة النهائية:
* اختاري بطاطس مناسبة للقلي أو الشوي، وبعدي عن اللي فيها مية كتير.
* ما تهمليش خطوة التجفيف بعد النقع.
* ما تحطيش زيت كتير؛ طبقة خفيفة تكفي لتغليف البطاطس.
* ما تخرجيش البطاطس من الفرن أول ما يتغير لونها، بل سيبيها لحد ما توصل للقرمشة اللي بتحبيها، وراقبيها علشان ما تحترقش.
هل يمكن عمل البطاطس في الفرن بدون نشا؟
نعم، ممكن تحضير البطاطس في الفرن من غير نشا، لكن استخدام كمية صغيرة منه ممكن يساعد في تكوين طبقة خارجية أكتر قرمشة.
ولو النشا مش متوفر، ممكن تعتمدي على النقع والتجفيف الجيد، مع عدم تكديس البطاطس في الصينية ورفع حرارة الفرن في مرحلة التسوية المناسبة.
سر البطاطس الذهبية
علشان أحسن نتيجة، سخني الصينية أو الفرن الأول، وبعدين حطي البطاطس بعد تجهيزها على طول. كمان يفضل عدم تغطية الصينية أثناء التسوية، لأن البخار الناتج بيخلي سطح البطاطس أطرى.
