أظافر متكسرة، نزيف مفاجئ في اللثة، أو حتى شعور دائم بالرغبة في تحريك رجليك.. كل دي أعراض ممكن تبدو عادية، لكن في بعض الحالات بتكون إشارة مبكرة على نقص فيتامينات ومعادن أساسية محتاجها جسمك عشان يشتغل زي الفل.
حسب تقرير نشره موقع Healthline، النظام الغذائي غير المتوازن ممكن يؤدي لظهور أعراض معينة، وبدل ما تروح تشتري مكملات من الصيدلية من غير استشارة طبية، الأفضل تنتبه للعلامات دي وتكشف عند الدكتور الأول.
1- ضعف الشعر وتقصف الأظافر
تقصف الشعر وضعف الأظافر ممكن يكون مرتبط بنقص فيتامين البيوتين (B7)، اللي بيساعد الجسم يحرق الطعام ويحوله لطاقة ويدعم صحة شعرك وأظافرك.
2- تقرحات الفم وتشققات زوايا الشفاه
لو بتعاني من قرح جوة الفم بشكل متكرر أو تشققات في زوايا الشفاه، ده ممكن يكون علامة على نقص الحديد أو نقص فيتامينات B1 وB2 وB6.
3- نزيف اللثة
مش دايمًا السبب إنك بتغسل أسنانك بعنف. نزيف اللثة ممكن يكون مؤشر على نقص فيتامين C، اللي دور الأساسي في التئام الجروح وتقوية المناعة.
4- ضعف النظر في الليل
لو بتلاقي صعوبة في الرؤية في الضوء الخافت، أو ظهرت بقع بيضا على العين، ده غالبًا مرتبط بنقص فيتامين A، العنصر المسؤول عن صحة الشبكية والإبصار.
5- قشرة الرأس وبقع جلدية
ظهور القشرة أو بقع جلدية متقشرة ممكن يكون بسبب انخفاض مستويات فيتامين B2 وB6، وطبعًا في عوامل تانية بتأثر على صحة الجلد.
6- تساقط الشعر
نقص الحديد، البيوتين، فيتامين B3، أو الأحماض الدهنية الأساسية كلها أسباب محتملة لتساقط الشعر. بس خد بالك، تناول مكملات من غير تشخيص مؤكد ممكن يأدي لنتايج عكسية.
7- حبوب حمرا أو بيضا على الجلد
النتوءات الصغيرة اللي بتظهر على الذراعين أو الفخذين أو الخدين، واللي بتشبه “جلد الوزة”، غالبًا مرتبطة بنقص فيتامين A وC عند ناس كتير.
8- متلازمة تململ الساقين
الشعور المتكرر إنك عايز تحرك رجليك وانت قاعد أو قبل النوم ممكن يكون علامة على انخفاض مخزون الحديد في جسمك. وده محتاج تقييم طبي قبل أي علاج.
